wachotaedjes au parfond do pus’

L’ noûf di mârs, dins lès gazètes ossi bén k’ a l’ tèlèvuzion, tot a sikèté au grand djoû :

“Amon lès Èditions Dupuis, Michèl Kennes, l’ dirècteû-djènèrâl, a dècidé d’ lèyî là l’ oûve èt d’ pèter èvoye dèl soce di Mârcinèle ki l’ françèse Media Participations a rachèté, i gn’ a deûs ans, à nosse, parèt-i financî walon, Bèbèr Frére.”

Pokwè ? Paski, po fé s’ bouye, Kennes n’ a pus totès sès aujes.

Po sayî d’ comprinde, plonkons dins lès djondants èt lès pondants come èsplikés lon èt laudje pa Claude Gendrot :

Dispû 17 ans ki dj’ î seû, a dit l’ Clåde, dji vwès voltîye Dupuis, po ck’ il a stî, po ck’ il èst au djoû d’ audjourdu èt po ck’ i dj’ inmeréve bén ki seûche dimwin : ène maujone d’ èplêdaedje èt nén ène fosse k’ on s’ continte d’ î rissatchî pa bégnons sès ritchèsses. Dins ène maujone d’ èdicion, po comincî i gn’ a lès ôteus, lès èditeûs èt tos lès bouteus ki fuchenut-is dèl finance, di l’ infwarmatike, dès abèrwèteûs, dins lès vintes, evd.

C’ èst lès loyins èteûre totès cès djins ki font l’ maujone, cès loyins dèl confyince ki s’ aspouye dissus lès crèyacions dès prumîs èt l’ ovrâdje dès shûvants. Tèrtos s’ rèspèctant l’ on l’ ôte po c’ ki s’ faît.

Dès simpès loyins èteure djins.

Lès loyins dès contrats èt dès caurs, k’ il faut bén fé avou, arivenut ddrî. Mins, cès loyins là duvenut èto s’ bén aspouyî dissus l’ rèspect d’ l’ ôte èt l’ ôteû, come l’ èplêdeû, duvnut wangnî come i faut leû vîye.

Tot au lon di s’ n’ istwêre, Dupuis a stî ène maujon difèrinte dès ôtes, ptète nén mèyeuse, mins difèrinte... Dispû vint ans, èle èst stokasse, sinne. Èle a todi grandi avou sès propes liârds, sins wêre d’ èprontaedjes, tote paujêre mins ardante.

N’ volà-t-i nén ki l’ novia actionère, Mèdia Participation, vént taper li tchèt dins lès pouyes. L’ voci à volu mète des astantches (po l’ èplêdaedje, l’ rèclame èt l’ vinte) à l’ indèpandance da Dupuis. A bén î riwêtî on vwêt pwinter l’ dismantèlmint di tot c’ ki fiève cit’ maujone : si âme !

Insi, dès kinze ruprésintants d’ Dupuis è l’ France, cink rotenut dèdjà èto po lès ôtes (Dargaud, Lombard, Kana, Blake et Mortimer...). L’ dirècteû dès vintes, à Paris (èt payî pa Dargaud) vout awè s’ mot à dîre dissus lès chwès d’ Marcinèle èt shène awè dès vîzêyes po fé signî lès minmès arindjmints amon Dupuis k’ amon Dargaud odobin l’ Lombard : tèrtos dissus l’ minme pî. On raploû là-dsus s’ a dèdja tinu, foû dèl présince da Dimitri Kennes èt Claude Gendrot.”

>

Apurdant tot çoulà, Dimitri Kennes a sicrît ène lete à Claude de Saint-Vincent, admistrateû di Dupuis, à Vincent Montagne, l’ pus gros dès caurleûs èt à Maîsse Jonet, Prézidint do Consey d’ administracion da Media Participations. Il lzeû î dijéve :

1. i vos faut waranti l’ indèpandance da Dupuis, dins sès vintes, s’ comêrce et lès drwèts-ki-vont-avou-èt-shûvenut-après (è l’ françès, droits dérivés, c.a.d po l’ uzaedje dins l’ rèclame, l’ cinèma, l’ tèlèvuzion èt cacayes come pititès posteures, pwate-clés, evd). Si tot èst bén cléri, dijéve-t-i, èt ki l’ caurleû dit oyi-da, li, Dimitri Kennes continuweréve s’ bouye di gènèral-dirècteû èt d’ èspliker comint.
2. si l’ pont 1 èst tapé au batch, i propozéve à Mèdia ki Dupuis fuchisse rachèté pa sès câdes (on Management Buy Out, come dit è l’ françès dès finançîs) èt d’ insi lî waranti s’n’ indèpandance.
3. s’ i gn’a pont d’ acwârd dissus s’ pont d’ vûwe, ajoutéve-t-i, c’ èst ki m’ contrat èst disloyî è ki dji n’a pus k’ a m’ dismète.

Sins pont d’ résponse à s’ lète, Dimitri Kennes s’ a dismètu.”

C’ èstéve li prumî ake do drame (o dèl comèdîye ?), on deuzyinme a shûvu :

Claude Gendrot, adon a anoncî à Clåde de Saint-Vincent ki, dins c’ ca-là, i n’ poléve pus, li non pus, djouwer s’ role d’ èditeû èt di dimander comint l’ maujone Dupuis, k’ Mèdia è nn’ èst l’ propiètêre, va fé avou tot ça. Gendrot n’ a nén cauzé d’ dèmissioner èt Saint-Vincent lî a rèspondu ièsse bén contint di s’n’ ovraedje èt awè dandjî d’ li.

Trwèzyinme ake :

L’ comité d’ dirèction da Dupuis, shût èt èvoye dès kèsses au caurleû Montagne tot passant pa l’ intèrmîje da Saint-Vincent. Pont d’ rèsponse èt, lès mimbes do comité, (mwins onk) dècidenut d’ propozer d’ rachèter Dupuis. Is dimandenut à Kennes di volu bén lès aspaler.

Kwatryinme ake :

L’ ofe ( 102.000.000 d’ uros !) èst faîte à Vincent Montagne èt Maîsse Jonet, pa-padvant Claude de Saint-Vincent et François Pernot. L’ résponse èst “nonna, fyoz c’k’ on vout dimande, odobin purdèz l’ uche”.

Cinkyinme ake :

Alain Flamion, direkteû d’ l’ infwarmatike èt dèl distribucion èt Claude Gendrot sont tapés à l’ uche : sins pont d’ want, d’ préyavi ni dringuèle d’ arvoye, mins po “grâve fôte”.

Dimitri Kennes, Claude Gendrot èt Alain Flamion sont sotenus pa lès ovreûs (ki fêyenut grève) dèl maujone Dupuis èt 200 di sès ôteûs èt dèssineûs.

Djan Van Hamme – ôteû-sicrîjeû ki rote au pus mia (=à sucsès) - ki s’ feume prind li plaece da Kennes, î va di s’ grin d’ sé èt d’ dimander : “ D’ èwou porîne rèxhe lès 102.000.000 d’ uros do “Management buy out” ? C’ n’ èst nén rén, 4 miyârds d’ vîs francs !”

I radjoute, sins volu li-minme waranti ène sakwè, ki Claude de Saint Vincent, k’ a vinu dinné à s’ tauve li djoû di dvant, lî a bén dit ki l’ indépandance da Dupuis n’ avéve måy sitî mèteuwe ankêye à l’ rominne.

Kennes, li, lî réspond k’ l’ ofe èst ”réyalisse”, ki n’ fauréve ki chîj mwès po ramèchner lès caurs... si tot l’ monde s’ î mèt : ôteûs, bouteûs dèl soce èt diridjants. Tèrtos èshone is sont capâbes di mète dissus l’ tauve lès liârds k’i faut.

Oyi-da, mins po ariver à s’ ètinde, i s’ faut sawè xhoûter...si èshone on s’ divize !

Li 7 d’ avri, Huguette Marien (novia dirècteu à l’ plaece da Kennes èt feume dan Djan Van Hamme) anonce à Nathalie Claes, dirèctrice dès finances, èt Anne Delchevalerie, dirètrice do pèrsonèl (lès omanes risourdants !) k’ èto èles sont mèteuwes à l’ uch.

Lès bouteûs d’ Marcinèle s’ rimètenut à fé grève.

Vincent Montagne, François Pernot èt Claude de Saint Vincent ont vnu lzeû èspliker k’ is n’ ont nén à s’ è fé. K’ tot va bén toûrner.

L’ Comité d’ dirècsion (do mwins l’ mitan k’ il è dimère co) adon dit “amen” èt tot l’ monde di s’ rimète à l’ ovrâdje.

Èteûre tins, Raoul Cauvin a dit l’ sène : “Dj’ inmeréve bén ritrover l’ èsprit Dupuis, cit-là d’ i gn’a sakants mwès, kwand on poléve si ritrover tèrtos èshène dins on fèstival èt riloper sakants possons...” C’ èst k’ l’ afêre ni l’ a pont djondu : “Dj’ a c’tchance-là, kwand dji mi staure dissus m’ divan, dji n’ pinse nén à ôte tchôze k’ a mès istwêres.

Nathalie Claes : “L’ situwation faît sogne. C’ èst nén tot soyant dès tièsses ki l’ angouche s’ è va. Ki do contrîre, c’ èst l’ conèchance di l’ osti k’ on a pièrdu. Dj’ èstéve li pus djonne, avou ût ans d’ maujone, dès cîs k’ on a mètu foû. Sakants avîne insi bouté pus d’ kinze ans amon Dupuis. C’ è-st-ène piède di sawèfé k’ i faut admète. Èt co, lès ôtes ossi s’ sintentut pièrdus. Grâce à on vèritâbe èsprit d’ maujone nos nos aspalînes. Tot n’ si va nén arindji ossi aujîmint.”

On ôteû dit l’ sène : “L’ grosse difèrince èst po lès abondrwèts (drwèts d’ ôteus). Dupuis èst l’ mêrseû a payî on “ficse” sins k’ l’ ôteû euche à rinde, kwand, après lès prumêrès vintes l’ disconte èst fait, cki lî astî a payî d’ avance... c’ ki faît k’ is sont bén payî. Adon, amon Dupuis is ont sogne ki lès ôteûs si sintenuche bén èt bouter avou totès lès aujistés.”

Kwand Gendrot a stî mètu foû, ène chîjinne di djonnes ôteûs, avou leû tchèf rèdakteû, Olivier Van Vaerenbergh, ont faît rèxhe on faû Spirou. On Spirate di 16 paedjes, ki s’ po trover èt kèrdjî aujîmint dissus l’ arincrin. Is î sipaudenut leûs idêyes dissus l’ afêre. Di dlà à dîre ki rixhène au “Trombonne Illustré”, ptète k’ is fêyenut èto dès faussès idêyes.

Insi, ène imådje î riprésinte dès grands do passé lès riwêtant di d’ làwôt. Oyi-da, mins c’ èst roviyî ki Franquin a faît on distoû amon l’ Lombard (Modèsse et Ponpon), ki Morris avéve zouplé amon Dargaud èt Peyo bagué au Lombard. C’ èst roviyî èto ki dès ôtes dins lès “vîs”, k’ on bén roté, s’ sont racafûrlés dins dès soces, èt minme dès S.A., po z-î mète à iute leûs contrats èt abondrwèts...

Di s’ costé, Yvan Delporte, done l’ idêye aus ôteus di n’ pus prinde ki dès ègadjemints (signî dès contrats) « intuitu firmae/intuitu firmae » K’ èsse ki ça vout dîre ? “Dji n’ signe k’ avou vos. Cit arindjemint ni m’ ègadjeréve pus si vos vinî à rivinde vosse maujone d’ èplêdaeje. Dins c’ ka là, di seû libe di riprinde mès mas (tos mès drwèts) èt d’ è nn’ d’aler djouwer avou on ôte.”

Èt nosse Yvan, k’ a stî l’ tchèf-rédacteû d’ Spirou do tins dès “grands dèssineûs, d’ rîre è s’ rosète baube èt d’ riminbrer k’ Guy Leblanc, l’ èditeû do Lombard, l’ djoû k’ il avéve rashoné sès ôteûs po lzeû anoncî ki l’ maujone avéve sitî vindeûwe (dèjà à c’k’ aléve divnu Mèdia Productions), aus cîs k’ èstîne tot èwarés d’ awè insi stî do minme côp vindus il avéve yeut on bia sorîre èt lzû dîre : “Kwand on cinsî vind s’ cinse, èsse k’ i dmande leû idêye à sès vatches ?”

Dupuis, Spirou, a stî lontin à paurt. I gn’ avéve-t-i ddins ène âme difèrinte ? Aloz sawè ! C’ èstéve lès djins k’ èstîne difèrints, k’ avîne dès voltés à paurt. Comint ? pokwè ? Ptète bén paski branmint d’ zèls avîne stî scolés pa ène sakî d’ bén à paurt : Jijé, Joseph Gillain (ki s’ popa avéve mètu au djoû lès “Cahiers Wallons” dès Rèlîs Namurwès

Lès èfants do “popa” Dupuis, èditeû, imprimeû d’ mèstî, ont waurdé on long tins lès tipografikès matchines po n’ nén mète à l’ uxh dès ovrîs. Po l’ minme rêzon, is ont continuwé zèls minmes à imprumer dès “albums” k’ arîne costé branmint mwins tchêr à l’ intridjîr.

Is boutîne co au “sintumint” ( sakants vont lomer ça “lârmes di krokodile”), riwêtîne aus liârds mins wazîne tot d’ minme prinde dès riskes ( Risque-Tout, Gag de Poche, Trombonne Illustré, imädjes ki bodjenut, evd.). Is avîne li néz po trover lès djins ki faléve (Jijé, vrêy popa dèl sicole di Mârcinèle; Djan Doisy, k’a mètu Spirou dissus l’ boune voye; Yvan Delporte, k’ avéve dès idêyes, evd) mins èto lès côps d’ song po lèyî passer oûte dès Goscinny èt Uderzo. Is n’ ont non pus nén trové, kwand il faléve, lès mots (èt c’k’ aléve avou) po ritnu dins leû choû dès Morris, Peyo, Roba...

Asteûre k’ tot shène ièsse rivnu dins l’ drwète voye, l’ cia k’ a signî po ène bèle pougnîye d’ annêyes èt k’ tot va bén por li (k’ sès vintes sont bounes) n’ a nén à z-awè peû. Tant k’ ça rote bén, on va s’ ocuper d’ li –èt co mia si pout rapwârter d’ pus avou dès fimes èt dès pititè bistokes di rèclame (gadjèts)- mins s’ i va falu ratinde k‘ il rapwate, ptète ki sès aujes s’ vont pigote à migote s’ racrapoter èt ki va duvu paurti s’ plaece èt ptète li lèyî à on ôte.

L’ sistinme Står Akadèmîye (mostrèz rade c’ ki vos valèz, on prind l’ mèyeû èt après, lès shûvants n’ ont k’ a s’ disbrouyî) va ptète pwinter s’ néz.

Dins l’ tins, lès ôteûs vikîne di l’ èplêdaedje à faît dins l’ Spirou. Lès drwèts po l’ album – ki tot l’ monde n’ poléve nén è nn’ awè l’ plêji – èstîne ène rawète (tiraedjes di 7.000 èt cink ans po lès vinde. Tant k’ l’ èditeû èt poléve mostrer 50, i n’ avéve nén à riyimprumer !) Bén après î sont vnus s’ radjouter lès drwèts di rèèdicion dins lès gazètes (Tintin passéve po rén dins lès gazètes, c’ èstéve ène rèclame po fé vinde lès albums). Sins co volu djôzer do cinèma, asteûre po ène sèrîye ki rote bén, lès abondrwèts d’ a costé rapwatenut dès cints èt dès miles. Mins lès djonnes arivenut tot d’ minme à viker avou l’ avance.

Didlà à s’ ritrover au mitan d’ on tropia sins awè l’ drwèt d’ meûler kwand on vos kandje di pachi...

Tinèz, volà k’ France-Soir s’ vind. L’ acostumance èst d’ volu taper dès djins à l’ uxh èt lès djins d’ fé grève... I gn’a t-i ène difèrince ? Vêlà, c’ èst l’ âme da Pîre Lazareff ki s’ vint disbautchî... Vindèz, vindèz ! Èsse k’ il va dimèrer ène plaece o l’ ôte ène picîye d’ indèpandance ? Alèz sawè !

Djozewal (foû d’ Rabulèts)

Post-Scriptum

« Six semaines après Claude Gendrot, c‚est au tour de Corinne Bertrand de claquer la porte. Arrivée il y a deux ans dans la maison pour travailler à la rédaction de Spirou, un mois avant que Dupuis ne soit revendue par Albert Frère à Média-Participations, elle avait gagné ses galons en assurant six mois plus tard la reprise de la collection Expresso, forte de quelque 13 à 14 nouveautés par an, après le départ de Sébastien Gnaedig pour Futuropolis. Elle a l'intention de continuer dans l'édition et déclare explorer « plusieurs pistes ». Y compris la piste « Gendrot-Kennes » dont on raconte qu'ils sont en train de créer une nouvelle maison d'édition et que plusieursauteurs sont d'ores et déjà contactés? L'éditrice préfère, pour l'instant, réserver sa réponse. »

Lexique

Wachotaedjes au parfond do pus’ agitations...

Clapotis, mouvements d' eau au fond du puits (jeu de mot)

èplêdaedje: édition (publication)

abèrwèteûs: fournisseurs :(lès cias ki apwatenut dins leûs bèrwètes :-)l' amougnî, l' apubliyî..

loyins: liens