N’ awè rén à dîre n’ oblidje nén à dimérer moya

Fortricherîyes ?

L’ an arivé au coron, nos èstans acostumés à voye, lîre èt oye, lès tireûs d’ cåtes, assetroleûs èt dijeûses d’ avni, tot nos anonçant cki nos va tchêre dissu l’ capotine, mète leû dwègt dissu lès sakants vûwes ki s’ sont mostrêyes à peu près djusses dins l’ banslêye dès cines di doze mwès d’ avant.

C’ èst drole, po cki èst dèl financîre crîse, c’ èst Pîron parêy. Parètréve k’ deûs trwès spèsialisses avîne vèyu lon èt anoncî ki l’ vént aléve toûrner èt fé pèter l’ bole dès crå intèrèts !

C’ èst don po ça k’ i nda k’ wêre à z’ awè rissatchî à tins leûs mas èt n’ nén piède leû marone tot come li pèkêye dès ptits satcheûs à l’ bouxhète ?

Crotes èt tchèrtèyes di mannèstés.

Lèyèz là èt n’ nén rascoude l’ cârte di visite di vosse tchén, ça vos va coster tchêr èt vilin. Minme k’ i vos faut, dins l’ astchèyance ki s’ poréve soladjî, awè d’ avance èt tot prèsse l’ satcho po ramasser !

Èt lès industriyèls bâtimints èt leûs tèrins toûnés à rén, d’ èwou vègnenut lès cårs po tot bén rinètiyî leûs mannèstés èt tot rimète à noû ?

Gris Paradis èt mancî linwaedje.

Parèt k’ dèdjà d’ pus d’ 2000 Zolandès, ène miète avant d’ prinde leû pinsion vègnenut bouter sakants eûres amon nos ôtes, î baguer, èt insi d’ profiter di nosse mèyeû rèdjime di Sociâle Sècurité ! I wangnenut 1/3 di pus vêci k’ si èstîne dimèrés è leûs cassines.

Pokwè n’ lzeû nén fé passer on ècsamin d’ walon ? Après tot, piski nosse linwaedje èst mancî èt k’ zèls sont sûtis, ostant k’is nos sièvenuche à ène pitite sakwè.

Ène fleûr difanîye dins l’ pachi ?

L’ Prétins èst là ! Djules Gazon k’a sicrît on lîve dissu l’ chômaedje nos dit k’ i n’ faut nén è fé l’ variâbe d’ adjustaedje do mârtchî d’ l’ ovraedje. D’ après li, ck’ i faut c’ èst waranti on contrat d’ novèle plaece à tos lès cîs ki pièdenut leû bèsogne.

Pus rade ki d’ l’ assurance-assistance chômaedje, i faut mète dissu pîds dès novèlès èmantchûres ki (à rlaye, disti l’ ome) dimandenut dès nén sûtîyes mwins èt insi n’ nén ièsse assatchîyes pa l’ intèrnacionâl martchi. Po fé passer l’ brouche dins lès reûwes èt richurer l’ bagaedje, on n’ va nén dèlocaliser po fé d’ pus bènèfices, è nn’ don ?
Kwèki, on « bon bèrdjî » a dèdjà tûzé à ça èt ritoûrner l’ problinme. Po bén rimpli s’ potche, il a mètu à l’ ovraedje dès sud-amèrikins sins-pont-d’ papî èt lès fé bèsognî à muxhète. L’ batch s’ a ritoûrné dissu c’ pourcia-là, mins n’ î a-t-i pont d’ parèy à li ?

Encarta,

L’ ècicopèdîye da Microsoft a l’ mora. L’ Wikipedia k’ èst po rén a faît s’ place dissu l’ arincrin : 2.800.000 artikes è l’ inglès, 774.000 è l’ françès èt dèdjà d’ pus d’ 11.000 è l’ walon… k’ î a èto s’ moti. Tot î èst po rén ! Èt dîre ki l’ Robert vos faît payî on abounmint d’ 48 uros l’ an po polu î taper à tanawète on ouy !

(s) L’ Vî Mouzon dissu l’ urèe.